為著欲予囡仔自細漢就有欣賞藝術文化的意識，文化部推動經費補助，予藝文團體會當申
請入去學校推廣，類別有包括表演藝術、工藝和文化資產等等6大領域。有藝文團體希望
這款補助，莫講今年有、明年就無，著愛延續落去，對藝術推廣和傳承才有久長的效果。

老師佮學生動手，了解傳統木工按怎做，這是台灣工藝美術學校和國中合作的工藝課，除
了木工，嘛有金工、上漆等等推廣課，創辦人表示，推廣台灣傳統工藝已經20年矣，目

台灣工藝美術學校創辦陳明輝表示：「用家己的方法家己用伊的手，開始做一寡物件，這
是咱這馬佇教育內底上欠的部份，所以就想講按呢做真好，愛予學生對細漢就開始了解工
藝，後擺大漢了後伊才知影講這工藝有偌媠，會去用遮的工藝的物件會曉欣賞。」

比論台南佳里吉和堂八家將，往過嘛有提著文化部的補助，佇濟濟學校開神將課程，希望
講予囡仔來認捌家將藝術，怹認為透過教育減少家長對八家將的誤解，嘛是做社會溝通的
過程。

台南佳里吉和堂八家將企劃陳譽萱表示：「我無想欲予囡仔真正學會曉跳八家將，其實是
會有這款的家長，所以阮這學期想講敢欲共變選修，比如藝術選修課程這種感覺，阮今仔
佇無仝學校試看覓，阮這禮拜有開畫面的課，就會變成轉去到體驗的感覺，就是講阮這禮
拜有畫面的課，有興趣的班級會當來參加。」

文化部這个補助計畫收件到3/31為止，工藝美術學校和吉和堂攏表示，這款學校課程和單
純一兩點鐘的推廣活動真無仝款，上無有一兩個月的時間予學生有深刻的理解，怹希望這
个補助莫今年有明年無，著愛延續落去，按呢對藝術推廣和傳承較有長遠的效果。